yozgatlı mehmet said

• m.1850'de yozgat’ta tevellüd 1918 yılında ankara’da vefat eden ,tanzimat yıllarında yaşayan, divan edebiyatımızın kayıp değerlerindendir.
  müsebba'sı meşhurdur ve her müslümanın kendine şiar edeceği türden nasihatlerle doludur.
  
  mihenden kaçma ger mahsûd-ı ihvân olmak istersen
  yetiş imdâd-ı mazlûmâna arslan olmak istersen
  yapış bir kâmilin destinden insan olmak istersen
  nebiyy-i efhamı medh eyle hassân olmak istersen
  rızâ bâbında bekle rahme şâyân olmak istersen
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  meserret-bahş olur gerçi ‘âdüvden ahz-ı sâr etmek
  fakat îcâb eder birçok mezâhim ihtiyâr etmek
  benim re’yimce hattâ nâ-becâdır inkisâr etmek
  fazîlettir onu ‘afv-ı keremle şerm-sâr etmek
  cinâyettir dil-i ebnâ-yı cinsi dâğ-dâr etmek
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  şu meydâna niçindir bu geliş ettinse ger tahkîk
  bütün ef’âlini eyle kitâba sünnete tatbîk
  gönül yıkma gönül yap cins ü mezhep etmeyip tefrîk
  eder bu hak sözü yerde beşer gökte melek tasdîk
  mezâlim âdemiyyetle değildir kâbil-i telfîk
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  gözetmekte rızâ-yı hakk’ı çeşmin hurdebîn olsun
  ehemm-i kâr u bârın hidmet-i dîn-i mübîn olsun
  ta’ârruz etme bir şahsa cesûr olsun cebîn olsun
  sitem lâyık mıdır nâsa husûsâ mü’minîn olsun
  ‘umûmen halk-ı ‘alem şerr ü mekrinden emîn olsun
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  yakışmaz bir sıfattır dil-şikenlik tab’-ı merdâne
  bu gülşende gül ol hâr olma çeşm-i andelîbâne
  geçinmekse merâmın istirâhatle hakîmâne
  elinden geldiği müddetçe sa’y et bezl-i ihsâne
  sezâ ancak budur her sâlik-i şeh-râh-ı ‘irfâne
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  ne lâzım hasmı ta’kîb eylemek ta’dîl-i efkâr et
  gelirse nefse hiddet kibriyâ-yı hakk’ı tezkâr et
  edip mahv-ı enâniyyet ‘ubûdiyyette ısrâr et
  leyâlîde le’âlî-i şirişki durma îsâr et
  garaz kâşânesin yık hıtta-i ‘irfânı i’mâr et
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  tuz ekmek hakkını hıfz eylemekte i’tinâ göster
  hudâ’dan gayre ‘arz-ı ihtiyâç etme gınâ göster
  şikâyet etme hak’tan halka her hâle rızâ göster
  tama’dan kıl ferâgat ehl-i îsâr ol sehâ göster
  düşen bî-keslere rahm et tarîk-i i’tilâ göster
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  tesâdüf eyledikçe bir fakîr ebnâ-yı âdemde
  edip taltîfîne himmet bırakma berzah-ı gamda
  ne buldun saklamakla surre-i dînâr u dirhemde
  gerek sahn-ı kenîsâda gerek beyt-i mükerremde
  hüner bir kalb-i mahzûnu sevindirmektir ‘âlemde
  sakın bir dîdeyi ağlatma handân olmak istersen
  dokunma hâtır-ı mûra süleyman olmak istersen
  
  fesâd ü mekri çoktur çerh ile ahz ü ‘atâdan geç
  haşv ü hâşâk ile doldurma kalbi mâsivâdan geç
  girip ihlâsla meyhâne-i ‘aşka riyâdan geç
  eğer pîrân ile ünsiyyet istersen hatâdan geç
  garaz hammâlı olma kîni terk et mâ-mezâdan geç
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  edersen bir iyilik intîzâr eyle mükâfâta
  yaparsan bir fenâlık hâzır ol ‘ayn-ı mücâzâta
  lihâzâ müstâkîm ol inhimâk etme huzûzâta
  eğer kîsende pâren var ise sarf eyle hayrâta
  şu nushi dinlemezsen dûş olursun çok beliyyâta
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  ekâbir meclisinden çıkma fennî mahrem-i râz ol
  kanâat göster aza devlet-i fakr ile mümtâz ol
  te’âlî kıl şikâr-ı himmeti kapmakta şahbâz ol
  târîk -i dil-nüvâzîde alıklık yapma kurnaz ol
  nüfûzun nisbetinde derd-mendâna devâ-sâz ol
  sakın bir dîdeyi ağlatma handân olmak istersen
  dokunma hâtır-ı mûra süleymân olmak istersen
  
  edit:mahlası ise fennî'dir.